- 22 Sep 2025
Bakı Avrasiya Universitetində (BAAU) 30 sentyabr – Beynəlxalq Tərcüməçilər Günü münasibətilə tədbir təşkil olunub. Görüşdə universitetin akademik-inzibati heyəti, Tərcümə kafedrasının müəllim və tələbələri iştirak ediblər.
Tədbiri universitetin beynəlxalq əlaqələr üzrə prorektoru dos. Sevda Rzayeva açaraq tərcümə fəaliyyətinin qloballaşan dünyada artan əhəmiyyətindən bəhs edib, tələbələri bu peşəyə peşəkarlıqla yanaşmağa və daim öz üzərlərində çalışmağa təşviq edib.
Tədbirdə qonaq qismində tanınmış sinxron tərcüməçilər İsrafil Xakiyev və Ramal Xosrovzadə, həmçinin universitetin Tərcümə kafedrasının müəllimi Elvin Abbasbəyli iştirak ediblər.
Sinxron tərcüməçi İsrafil Xakiyev çıxışında sinxron tərcümənin texniki və psixoloji çətinliklərindən bəhs edərək, bu sahədə uğur qazanmağın əsas şərtlərinin dəqiq dil biliyi, diqqət və peşəkar yanaşma olduğunu vurğulayıb.
Ramal Xosrovzadə isə tərcüməçinin mədəniyyətlərarası körpü rolunu qeyd edərək bildirib ki, bu peşə uzunmüddətli təcrübə, müşahidə qabiliyyəti və davamlı inkişaf tələb edir.
Tərcümə kafedrasının müəllimi Elvin Abbasbəyli çıxışında tələbələrə təhsil müddətində nəzəri biliklərlə yanaşı praktiki təcrübə toplamağın, sahə üzrə real mühitlə tanış olmağın zəruriliyini diqqətə çatdırıb.
Tədbir interaktiv sual-cavab sessiyası ilə davam edib. Qonaqlar tələbələrlə şəxsi təcrübələrini bölüşərək onların ünvanladıqları sualları cavablandırıblar.
Görüşün sonunda xatirə şəkilləri çəkilib.
