• 03 Mar 2025

Azərbaycan Milli Elmlər Akademiyasının (AMEA) Nəsimi adına Dilçilik İnstitutu Bakı Avrasiya Universitetinin (MDU) kitabxana fonduna 125 kitab hədiyyə edilib.
Bununla əlaqədar olaraq, 2025-ci il fevralın 28-də sözügedən kitabların BAAU kollektivinə təqdimatı keçirilib. Təqdimat mərasimində AMEA Nəsimi adına Dilçilik İnstitutunun Elmi Kitabxanasının müdiri Sevil Zülfüqarova, Azərbaycan dili tarixi şöbəsinin müdiri Xədicə Heydərova, kitabxanaçı Sona Məmmədova və BAAU-nun akademik-inzibati heyət üzvləri iştirak edib.
Təqdimat mərasimində çıxış edən BAAU-nun Elmi işlər üzrə prorektoru, prof. Gülzar İbrahimova göstərilən dəstəyə görə AMEA Dilçilik İnstitutunun rəhbərliyinə və müvafiq əməkdaşlarına təşəkkürünü bildirib. Kitabların BAAU-da müvafiq ixtisaslar üzrə kadr hazırlığının keyfiyyətinin yüksəldilməsinə mühüm töhfə verəcəyinə əminliyini ifadə edən prorektor tələbə və müəllim kollektivini hədiyyə edilən kitablardan faydalanmağa dəvət edib.
AMEA Nəsimi adına Dilçilik İnstitutunun Elmi Kitabxanasının müdiri S.Zülfüqarova BAAU kollektivinə institutun nəşrlərinə göstərdikləri marağa görə təşəkkür edib. O, bildirib ki, hədiyyə edilən kitablar Azərbaycan dilçiliyi, qramatika, terminologiya, frazeologiya, etimologiya, leksikologiya və digər sahələri əhatə edən fundamental tədqiqatları özündə birləşdirir.
BAAU-nun Kitabxana və İnformasiya Mərkəzinin fonduna kitablar hədiyyə etdiyinə görə S.Zülfüqarovanın timsalında AMEA Nəsimi adına Dilçilik İnstitutuna təşəkkürnamə təqdim edilib.
Qeyd edək ki, hədiyyə edilən kitablar arasında dilçilik elminin müxtəlif sahələri üzrə aparılmış fundamental tədqiqatlar, elmi monoqrafiyalar, lüğətlər və dərs vəsaitləri yer alır.