• 03 Apr 2025

Bakı Avrasiya Universitetində (BAAU) 31 Mart – Azərbaycanlıların Soyqırımı Gününə həsr olunmuş anım tədbiri keçirilib. Tədbirdə universitetin akademik-inzibati heyəti və tələbələr iştirak ediblər.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra şəhidlərin əziz xatirəsi bir dəqiqəlik sükutla yad edilib.
Açılış nitqi ilə çıxış edən BAAU-nun İqtisadiyyat kafedrasının müdiri, dosent Vüsalə Nağıyeva 1918-ci ilin martında baş verən hadisələr haqqında ətraflı məlumat verib. O, erməni silahlı dəstələrinin Bakı və ətraf bölgələrdə dinc əhaliyə qarşı törətdiyi vəhşilikləri tarixi faktlarla iştirakçıların diqqətinə çatdırıb, bu hadisələrin xalqımızın yaddaşında silinməz izlər buraxdığını bildirib.
Sonra, tədbirin proqramına uyğun olaraq məruzələr dinlənilib.
BAAU-nun Nəzəri dilçilik və türk dilləri kafedrasının professoru Ədalət Tahirzadə 31 Mart Soyqırımının tarixi və soyqırıma hazırlıq barədə danışıb, soyqırımın baş verməsinə səbəb olan tarixi şərait və erməni silahlı dəstələrinin təşkilatlanmasını izah edib. Humanitar fənlər və regionşünaslıq kafedrasının dosenti Əjdər Yunusov soyqırımın səbəbləri və nəticələrinin milli yaddaşımıza olan mənəvi və psixoloji təsirini geniş şəkildə təhlil edib. Həmin kafedranın dosenti Jalə İsmayılova Türk-müsəlman soyqırımı mühacir tarixşünaslığında necə əks olunduğunu və mühacir tarixçilərinin bu faciəni sənədləşdirmə cəhdlərini açıqlayıb. Müəllim Aygün İsmayılova soyqırımın əks olunduğu tarixi mənbələr barədə danışıb, dövrün arxiv materialları və şahid ifadələrinə əsaslanaraq hadisələrin daha aydın anlaşılmasını təmin edib. Nəzəri dilçilik və türk dilləri kafedrasının baş müəllimi İlhamə Şıxıyeva soyqırımın yalnız fiziki deyil, həm də milli kimliyə və ləyaqətə qarşı olan hücum olduğunu vurğulayıb, bu faciənin azadlıq və namus anlayışına təsirini izah edib.
Tədbirin sonunda universitetin Tələbə Elmi Cəmiyyətinin hazırladığı 31 Mart soyqırımına həsr olunmuş videoçarx nümayiş etdirilib. Videoçarxda tələbə gənclər faciənin tarixi gerçəklikləri, faktlarla bağlı məlumat veriblər.