- 30 May 2025
Bakı Avrasiya Universitetinin (BAAU) kitabxanasında “Azərbaycan-Polşa: birlikdə gələcəyə doğru” mövzusunda tematik konfrans keçirilib. Konfransın təşkilatçısı qismində Universitetin Humanitar fənlər və regionşünaslıq kafedrasının müəllimi, Azərbaycandakı Poloniya icmasının aktiv üzvü Roman Ağayev və “Beynəlxalq münasibətlər” ixtisası üzrə təhsil alan II kurs tələbələri iştirak ediblər.
Azərbaycan Respublikasının müstəqilliyinin 107-ci ildpnümünə həsr olunmuş tədbiri açan R.Ağayev konfransın fəxri qonağı – Azərbaycandakı Poloniya icmasının fəalı Vadim Geri salamlayaraq qeyd edib ki, Azərbaycanla Polşa arasındakı münasibətlər müxtəlif mərhələlərdən keçmiş və sıx bağlantılar yaradan böyük tarixə malikdir, müasir dövrdə isə çoxşahəli şəkildə inkişaf etməkdədir. Daha sonra tələbələr hazırladıqları məruzələrə keçid alıblar.
Azərbaycan-Polşa münasibətlərinin yaranması və Azərbaycan polyaklarının birinci dalğasından tələbə Xəyalə Məmmədli, XIX əsrin ikinci yarısı – 1920-ci ilə qədər ikinci dalğasından – Fidan Şahbazlı, Sovet dövründəki Azərbaycan polyaklarından isə Nuray Əhmədli danışıblar. Müasir Azərbaycan-Polşa münasibətləri mövzusunda Mədinə Nəsibova çıxış edib. Tələbələr Leyli Əzizova və Əlibəy Sadıqlı isə müvafiq olaraq Azərbaycan Xalq Cümhuriyyətinin banilərindən biri Məhəmməd Əmin Rəsulzadənin polyak xanımı Vanda və Polşa ordusunun azərbaycanlı polkovniki Vəlibəy Yadigar haqqında məruzələr ediblər. Fidan Cavadzadə çıxışını müasir dövrdə Polşa azərbaycanlıları və Azərbaycan polyakları, eləcə də Polşanın Azərbaycandakı Səfirliyinin fəaliyyətinə həsr edib.
Tədbirin fəxri qonağı Azərbaycandakı Poloniya icmasının fəalı Vadim Ger konfransın təşkilatçılarına və iştirakçılarına minnətdarlığını bildirərək ümidvar olduğunu bildirib ki, bu kimi əhəmiyyətli və Azərbaycan-Polşa dostluğunun daha da möhkəmləndirilməsinə xidmət edəcək tədbirlər davamlı olacaq.
Tədbir iştirakçıların suallarının cavablandırılması ilə yekunlaşıb.
