• 19 Dec 2024

Bakı Avrasiya Universitetində (BAAU) Filologiya fakültəsi, Tərcümə kafedrası və Tələbə Gənclər Təşkilatının birgə təşkilatçılığı ilə "Heydər Əliyev Azərbaycanı dünyaya tanıdan lider" adlı tədbir keçirilib. Ulu öndər Heydər Əliyevin Azərbaycanın müstəqilliyi və inkişafı yolundakı xidmətlərini gənc nəslə tanıtmaq və onun zəngin irsini təbliğ etmək məqsədi daşıyan tədbirdə BAAU-nun Filologiya fakültəsinin akademik-inzibati heyəti, yerli və əncəbi tələbələri iştirak edib.
Tədbir Azərbaycan Respublikasının Dövlət Himninin səsləndirilməsi, Ümummilli lider Heydər Əliyevin, ölkənin müstəqilliyi və ərazi bütövlüyü uğrunda canından keçən şəhidərin əziz xatirəsinin bir dəqiqəlik sükutla yad edilməsi ilə başlayıb.
Tədbirin açılışında BAAU-nun Tərcümə kafedrasının müdiri vəzifəsini müvəqqəti icra edən Nigar Əliyeva çıxış edərək ümummilli lider Heydər Əliyevin ölkəmizin beynəlxalq arenada tanıdılması istiqamətində həyata keçirdiyi strateji addımlar barədə məlumat verib. O, Ulu öndərin təhsil, diplomatiya və iqtisadi sahələrdə qurduğu möhkəm təməllərin Azərbaycanın bu gün qazandığı uğurlarda mühüm rol oynadığını vurğulayıb.
Açılış nitqindən sonra tədbir BAAU-nun tələbələrinin Azərbaycan və ingilis dillərində qarşılıqlı müzakirələri ilə davam edib. Müzakirələrdə təhsil, diplomatik uğurlar, mədəni irsin qorunması və xarici siyasətin əhəmiyyəti kimi mövzulara toxunulan çıxışlar edilib.
Qeyd edək ki, dahi şəxsiyyət Heydər Əliyevin irsinin öyrənilməsi və tələbələr arasında təbliği BAAU-da daim diqqət mərkəzindədir.