• 20 Dec 2024

Bakı Avrasiya Universitetində (BAAU) “İnternetin müasir çağırışları və təkamülü prosesi” mövzusunda eminar keçirilib. Seminarda BAAU-nun bir qrup əməkdaşı və tələbələri iştirak edib.
Seminarın açılış nitqini BAAU-nun Beynəlxalq əlaqələr üzrə prorektoru, dosent Sevda Rzayeva edib. O, çıxışında internetin müasir cəmiyyət üçün əhəmiyyətindən bəhs edərək elm, təhsil və digər sahələrdə internetin yaratdığı imkanlara diqqət çəkib və rəqəmsal dünyada qarşıya çıxan problemlərin həllində süni intellekt vasitələri, tədqiqatlar və innovativ yanaşmaların əhəmiyyətini vurğulayıb.
Seminarda protokol və şəbəkə mühəndisliyi üzrə Koreya Respublikasından olan mütəxəssis Woojik Chun (Vujik Çun) təqdimatla çıxış edib. O, təqdimatında internetin təkamül tarixindən danışaraq, onun yaranma mərhələləri, bugünkü vəziyyəti və gələcək perspektivlərini əhatə edən məsələləri iştirakçılarla bölüşüb. Koreyalı mütəxəssis internetin başlanğıcından bugünkü “Web3” texnologiyalarına qədər olan inkişafını və bu prosesdəki texniki və sosial transformasiyaları geniş təhlil edib. O, internet texnologiyalarının dəstəklədiyi mövcud həllər və onların məhdudiyyətləri barədə məlumat verib.
Sonda tələbələri maraqlandıran suallar cavablandırılıb.