• 04 Nov 2024

Bakı Avrasiya Universitetinin (BAAU) rektoru, dos. Səyavuş Qasımov Qətər Əmirliyinin Qətər Universitetinin "Qeyri-ərəblər üçün Ərəb Dili Mərkəzi"nin əməkdaşı Dr. Abeer Heider ilə görüşüb. Görüşdə BAAU-nun Ərəbşünaslıq Mərkəzinin direktoru, dos. Ülviyyə Hüseynova da iştirak edib.
Rektor Qətər Əmirliyinin mötəbər ali təhsil müəssisəsinin nümayəndəsini BAAU-da görməkdən böyük məmnunluq duyduğunu ifadə edərək, Qətər Universiteti ilə əlaqələrin qurulması, müəllim-tələbə mübadiləsi və birgə fəaliyyət sahələrində maraqlı olduqlarını bildirib. S.Qasımov qeyd edib ki, belə dostluq əlaqələri elm və təhsil istiqamətində yeni layihələr və əməkdaşlıqlar üçün geniş perspektivlər açır.
Dr. A.Heider göstərilən diqqətə və dəvətə görə təşəkkürünü bildirərək, Azərbaycanın ali təhsil müəssisələri ilə Qətər Əmirliyinin universitetləri arasında əlaqələrin qurulması və gələcəkdə genişlənməsi üçün körpü rolunu oynamaq istədiyini vurğulayıb. Qətər Universiteti haqqında ətraflı məlumat verən qonaq, bu ali təhsil müəssisəsinin Qətər Əmirliyinin yeganə dövlət universiteti olduğunu diqqətə çatdırıb.
Daha sonra, Dr. A.Heider BAAU-nun Filologiya fakültəsinin tələbələrinə “Qeyri-ərəblər üçün ərəb dilində şifahi nitqin inkişafı yolları” mövzusunda təlim keçib.
Təlim zamanı ərəb dilinin inkişaf etdirilməsində istifadə edilən metodlar, praktiki məşğələlər üçün resurslara çıxış yolları barədə məlumat verilib və tələbələrin öyrənmə prosesində qarşılaşa biləcəkləri çətinlikləri aşmaları üçün tövsiyələr verilib.
Təlimin sonunda tələbələr ərəb dilində daha sərbəst danışmaq və şifahi nitq bacarıqlarını inkişaf etdirmək üçün müxtəlif praktik tapşırıqlar yerinə yetiriblər.