• 01 Nov 2024

Bakı Avrasiya Universitetinin (BAAU) Tələbə Gənclər Təşkilatının (TGT) nəzdində fəaliyyət göstərən “SDGs for Youth” klubunun təşkilatçılığı ilə tələbələr arasında Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) həsr olunmuş “Yaşıl ekran: İqlim və gələcəyimiz” adlı film gecəsi keçirilib.
Layihənin əsas məqsədi tələbələrə iqlim dəyişikliklərinin təsirləri haqqında daha geniş məlumat vermək, COP29 zirvəsində aparılan müzakirələr və qəbul edilən qərarların mahiyyətini onların diqqətinə çatdırmaq olub. Tədbir vasitəsilə tələbələrin ekoloji problemlərə daha həssas yanaşması və gələcəyin ekoloji çağırışlarına qarşı daha məlumatlı mövqe sərgiləməsi hədəflənib.
Film gecəsində iqlim dəyişikliyi mövzusunu əks etdirən və dünya miqyasında bu sahədə atılan addımları işıqlandıran ekran əsərləri nümayiş etdirilib. Hər bir nümayişdən sonra tələbələr arasında müzakirələr aparılıb, onları düşündürən məsələlər ətrafında fikir mübadiləsi edilib və fərdi töhfələrin əhəmiyyəti vurğulanıb.
Bu təşəbbüs tələbələrin iqlim dəyişikliyinə qarşı mübarizədə aktiv rol oynaması və dayanıqlı inkişaf məqsədlərinə uyğun fəaliyyət göstərməsi üçün ilham mənbəyi olub.