• 01 Nov 2024

Bakı Avrasiya Universitetinin (BAAU) tələbələrinin “Azərenerji” ASC-nin Tədris Mərkəzinə “Yaşıl Dünya Naminə Həmrəylik İli” çərçivəsində, Birləşmiş Millətlər Təşkilatı Baş Assambleyası tərəfindən qəbul edilmiş Dayanıqlı İnkişaf Məqsədlərindən biri olan “Səmərəli və Təmiz Enerji” və İqlim Dəyişmələri üzrə Çərçivə Konvensiyasının Tərəflər Konfransına (COP29) həsr olunmuş ekskursiyası təşkil olunub.
Ekskursiya çərçivəsində tələbələr Tədris Mərkəzinin fəaliyyəti ilə yaxından tanış olublar. Məlumat verilib ki, Tədris Mərkəzinin əsas fəaliyyəti “Azərenerji” ASC-də çalışan əməkdaşların bilik və bacarıqlarının artırılması istiqamətində müxtəlif təlim və seminarların təşkili, eləcə də müvafiq ixtisaslarda təhsil alan tələbə və magistrantlara təcrübə mərhələsindən ibarətdir. Tədris Mərkəzinin əməkdaşı Rəşad Əbilov tərəfindən yaşıl enerji və onun ölkə ərazisindəki tətbiq perspektivləri barədə geniş məlumat verilib, işğaldan azad edilmiş ərazilərin yaşıl zona elan olunması və orada tikilib istifadəyə verilmiş Su Elektrik Stansiyalarının əhəmiyyəti haqqında danışılıb. Yaşıl enerji istiqamətində atılan addımların karbon emissiyasının azaldılmasına və bərpa olunan enerji mənbələrindən istifadənin ətraf mühitin qorunmasına töhfə verdiyi bildirilib.
Sonra “Azərenerji” ASC-nin əməkdaşı Səxavət Mirzəyev təqdimatla çıxış edib. Təqdimat zamanı COP29-un Azərbaycanda keçirilməsinin əhəmiyyəti, bərpa olunan enerji mənbələrindən istifadənin ekoloji təhlükəsizlik və davamlılıq baxımından üstünlükləri, ölkəmizdə onlardan istifadə perspektivləri, Qarabağda tikilən və yenidən qurma işləri aparılan Elektrik Stansiyaları və Yarımstansiyaların yaşıl enerji zonasına daxil edilməsi istiqamətində görülən işlər barədə məlumat verilib.
Sonda tələbələri maraqlandıran suallar cavablandırılıb, fikir mübadiləsi aparılıb.
Qeyd edək ki, “Yaşıl Dünya Naminə Həmrəylik İli” çərçivəsində BAAU-da silsilə tədbirlər keçirilir.