• 24 Oct 2025

Mingəçevir Dövlət Universiteti (MDU), Azərbaycan-Türkiyə İş Adamları Birliyi (ATİB) və “HBN Group Academy”nin birgə təşkilatçılığı ilə “Regional Universitet-Sənaye Birliyi Sammiti 2025” keçirilib.

Sammit Ulu Öndər Heydər Əliyevin və Vətən uğrunda şəhid olmuş qəhrəmanların əziz xatirəsinin bir dəqiqəlik sükutla yad edilməsi və “Zəfər sədası” uşaq xor qrupunun ifasında Azərbaycan Respublikasının Dövlət Himninin səsləndirilməsi ilə başlayıb.

Tədbirin əsas məqsədi regionlarda universitetlərlə sənaye müəssisələri arasında əməkdaşlığın gücləndirilməsi, gənclərin məşğulluq imkanlarının artırılması və innovasiya potensialının inkişaf etdirilməsi olub. Sammit çərçivəsində iştirakçılar ali təhsil müəssisələrinin sənaye sektoru ilə inteqrasiyası, innovativ təşəbbüslərin təşviqi və əmək bazarının çağırışlarına uyğun əməkdaşlıq modelləri barədə fikir mübadiləsi aparıblar.

Sammitdə Bakı Avrasiya Universiteti (BAAU) də təmsil olunub. Universiteti tədbirdə Karyera və Təlim Mərkəzinin müdiri Natiq Xəlilov təmsil edib. BAAU nümayəndəsi təhsil-sənaye əməkdaşlığının inkişafı, innovativ layihələrin dəstəklənməsi və tələbələrin karyera inkişafı imkanlarının genişləndirilməsi istiqamətində keçirilən müzakirələrdə fəal iştirak edib.

“Regional Universitet-Sənaye Birliyi Sammiti 2025” ölkənin regionlarında universitet-sənaye əlaqələrinin möhkəmləndirilməsinə, eləcə də gənclərin əmək bazarına inteqrasiyasına mühüm töhfə verən platforma kimi dəyərləndirilib.