• 23 Dec 2024

Bakı Avrasiya Universitetinin (BAAU) rektoru, dosent Səyavuş Qasımov Türkiyə Respublikasının Niğde Ömerhalisdemir Universitetinin (NOHU) rektoru, professor Hasan Uslu ilə görüş keçirib. Görüş zamanı NOHU-nun rektoru S.Qasımovun BAAU-nun rektoru təyin olunması münasibətilə təbriklərini çatdırıb və ona gələcək fəaliyyətində uğurlar arzulayıb.
İki universitet arasında əməkdaşlığın daha da möhkəmləndirilməsi, mübadilə və ikili diplom proqramlarının genişləndirilməsi mövzuları müzakirə olunub. Həmçinin, müvafiq fənlər üzrə ustad dərsləri və mühazirələrin təşkil olunması ilə bağlı fikir mübadiləsi aparılıb.
Görüşdə BAAU-nun Tədris işləri üzrə prorektoru, dosent Nigar Hüseynova, Beynəlxalq əlaqələr üzrə prorektor, dosent Sevda Rzayeva, Regionşünaslıq və iqtisadiyyat fakültəsinin dekanı, dosent Mütəllim Rəhimov və NOHU-nun Mühəndislik fakültəsinin dekanı, professor Murat Barut da iştirak ediblər.
Qeyd edək ki, BAAU ilə NOHU arasındakı əməkdaşlıq 2019-cu ildə imzalanmış memorandum ilə başlayıb və bu çərçivədə tələbə mübadiləsi, birgə layihələr və konfranslar həyata keçirilib.