• 30 Sep 2025

Bakı Avrasiya Universiteti (BAAU) ilə Polşanın Krakow şəhərində yerləşən Təhsil Milli Komissiyasının Universiteti (University of the National Education Commission, UKEN) arasında elmi və tədris sahəsində əməkdaşlığı nəzərdə tutan ikitərəfli razılaşma imzalanıb.

Sənəd BAAU-nun rektoru, dosent Səyavuş Qasımov və UKEN-in Tədris İşləri və İnkişaf üzrə prorektoru, professor Robert Stawarz tərəfindən imzalanıb.

Razılaşma çərçivəsində iki universitet arasında elmi-tədqiqat əməkdaşlığının gücləndirilməsi, ortaq layihələrin hazırlanması, tələbə və müəllim mübadiləsinin təşkili, eləcə də müxtəlif səviyyələrdə birgə tədris proqramlarının yaradılması nəzərdə tutulur. Tərəflər həmçinin Erasmus+ kimi beynəlxalq proqramlar çərçivəsində əməkdaşlıq, elmi informasiya və nəşrlərin mübadiləsi, eləcə də seminar və konfransların birgə təşkili istiqamətində fəaliyyət göstərəcəklər.

Bu razılaşma Bakı Avrasiya Universitetinin beynəlxalq əməkdaşlıq strategiyası çərçivəsində Avropa ali təhsil məkanında əlaqələrini daha da gücləndirməsinə və tələbələr üçün yeni akademik imkanlar yaratmasına xidmət edir.