• 25 Dec 2024

Bakı Avrasiya Universitetində (BAAU) Tələbə Cəmiyyətinin təşkilatçılığı ilə “Yaşıl dünya naminə həmrəylik ili” çərçivəsində “Yaşıl dünya Naminə Həmrəylik ili - 2024” adlı tədbir keçirilib. Tədbir BMT-nin Dayanıqlı İnkişaf Məqsədlərinə (DİM) uyğun olaraq təşkil edilib.
BAAU-nun Filologiya fakültəsinin tələbəsi Əfsanə İsmayılovanın moderatorluğunda ingilis dilində təşkil edilmiş tədbirdə ekologiyanın müasir dünyada əhəmiyyəti vurğulanıb, qlobal istiləşmə, su və torpaq çirklənməsi kimi ciddi ekoloji problemlər haqqında tələbələr çıxışlar ediblər. Bu çıxışlar DİM-in məqsədlərindən biri olan “İqlim dəyişikliyinə qarşı mübarizə”yə töhfə olaraq qlobal iqlim dəyişikliklərinə dair məlumatlılığın artırılmasını hədəfləyib.
Həmçinin, DİM-in məqsədlərindən digər biri olan “Yerüstü ekosistemin qorunması”na uyğun olaraq meşə yanğınlarının qarşısının alınması və təbiətin qorunması istiqamətində görülməli olan tədbirlər haqqında fikir mübadiləsi aparılıb.
Daha sonra ekoloji maarifləndirmə ilə bağlı tələbələr tərəfindən səhnəcik canlandırılıb. Bu isə tələbələrə DİM-in “Keyfiyyətli təhsil” məqsədinə uyğun olaraq ətraf mühitin mühafizəsi haqqında bilik və bacarıqlarını nümayiş etdirmək imkanı yaradıb.
Tələbələrin ekoloji problemlərin həlli istiqamətində keçirdikləri tədbiri təqdirəlayiq addım kimi qiymətləndirən Xarici dil və ədəbiyyatı kafedrasının nümayəndələri hər bir insanın gündəlik həyatında ekoloji şüurla hərəkət etməli olmasına diqqət çəkərək bu tip maarifləndirici görüşlərin əhəmiyyətli olduğunu bildiriblər.
Qeyd edək ki, “Yaşıl dünya naminə həmrəylik ili” çərçivəsində BAAU-da mütəmadi olaraq müxtəlif tədbirlər keçirilir. Universitetdə bu cür təşəbbüslərin həyata keçirilməsi dayanıqlı inkişaf məqsədlərinə töhfə vermək və ekoloji məsələlər üzrə tələbə gənclər arasında məlumatlılığı artırmaq üçün vasitə kimi qiymətləndirilir.