• 12 Feb 2026

Bakı Avrasiya Universitetinin (BAAU) Beynəlxalq əlaqələr və layihələrin idarəedilməsi departamenti ilə Elm, İnnovasiya və Doktorantura sektorunun birgə təşkilatçılığı ilə “Düzgün jurnal seçimi və müəllif hüquqları” mövzusunda tədqiqat vorkşopu onlayn formatda və hər kəsə açıq Google Meet platforması üzərindən təşkil edilib. 

Sözügedən vorkşopun təşkilində məqsəd tədqiqatçıların, gənc alimlərin, doktorant və magistrantların elmi nəşr prosesində qarşılaşdıqları çətinliklərin aradan qaldırılmasına metodiki dəstək göstərmək və onların beynəlxalq elmi platformalarda daha effektiv fəaliyyətini təşviq etmək olub.

Vorkşop BAAU-nun Beynəlxalq əlaqələr üzrə prorektoru, dosent Sevda Rzayevanın açılış nitqi ilə başlayıb. O, çıxışında belə təşəbbüslərin universitetdə elmi fəaliyyətin inkişafına və beynəlxalq elmi mühitə inteqrasiyaya mühüm töhfə verdiyini vurğulayıb.

Vorkşopun qonaq spikeri İzmir Texnologiya İnstitutunun Kitabxana İdarəsinin müdiri, OpenAIRE İdarə Heyətinin üzvü və Research Ecosystems A.Ş.nin həmtəsisçisi Gültekin Gürdal olub. O, çıxışında elmi məqalələr üçün düzgün jurnal seçiminin əsas meyarları, beynəlxalq indeksləmə sistemlərinin tələbləri, açıq elmin prinsipləri, eləcə də müəllif hüquqlarının qorunması və nəşr prosesində diqqət yetirilməli hüquqi məqamlar barədə ətraflı məlumat verib.

Vorkşop çərçivəsində iştirakçıların sualları cavablandırılıb, jurnal seçimi və müəllif hüquqları ilə bağlı aktual məsələlər ətrafında geniş müzakirələr aparılıb.