• 09 Apr 2024

Bakı Avrasiya Universitetində 9 aprel 2024-cü il tarixində  Bakı Avrasiya Universitetinin Tələbə Gənclər Təşkilatı və “Qeyd-Sosial Maarifləndirmə” İctimai Birliyinin birgə təşkilatçılığı ilə “Heydər Əliyev-Unudulmaz lider” adlı foto-xalça sərgisinin təqdimat mərasimi keçirilib. Təşkil olunan foto-xalça sərgisində BAAU-nun rəhbərliyi, professor-müəllim heyəti, tələbələri, qonaq qismində isə Azərbaycan Respublikası Milli Məclisinin deputatı Naqif Həmzəyev, “Qeyd-Sosial Maarifləndirmə” ictimai birliyinin sədri Tural Nurməmmədov və birliyin  baş katibi Aysel Tahirova iştirak ediblər.

Sərgi iştirakçıları tərəfindən universitetin həyətində dahi şəxsiyyət, Ümummilli Lider Heydər Əliyevin həyatını və dövlətçilik fəaliyyətini əks etdirən fotoların əks olunduğu xalçalara baxış keçirilib. Xalçalar üzərində təsvir edilmiş rəsmlər, xalçaların toxunuşları sərgi iştirakçıları tərəfindən maraqla qarşılanıb.

Tədbirdə çıxış edən universitetin Rektor köməkçisi Şəfahət Əliyev, Milli Məclisin deputatı Naqif Həmzəyev, Tədrisin təşkili departamentinin rəhbəri Natella Quliyeva, Regionşünaslıq və İqtisadiyyat fakültəsinin dekanı dosent MütəllimRəhimov bir-birindən maraqlı çıxışlar ediblər. Onlar sözügedən sərginin təşkilini yüksək qiymətləndirib, müasir və müstəqil Azərbaycan dövlətinin memarı və qurucusu Ulu Öndər Heydər Əliyevin Azərbaycan xalqı və dövləti qarşısındakı misilsiz tarixi xidmətlərindən,Respublikamızın tərəqqisinin təmin olunması və digər istiqamətlərdə tarixi əhəmiyyətə malik olan xidmətlərndən geniş söz açıblar. Tədbir iştirakçılarının böyük marağına səbəb olan sərgi bir neçə saat davam edib.